تاند ( دوشنبه د لیندۍ ـ قوس ۲۴مه) د طالبانو د حکومت ویاند ذبیح الله مجاهد د نړیوال بانک راپور د یوې برخې په خپرولو سره ویلي چې، روان میلادي کال په افغانستان کې انفلاسیون یا د پیسو پړسوب په منځني ډول دوه سلنه اټکل شوی، چې دا د سیمې په پرتله تر ټولو ټيټه کچه ده.
انفلاسیون یا د پیسو پړسوب هغه اقتصادي حالت ته ویل کیږي، چې پکې د وخت په تېرېدو سره د توکو په وړاندې د پیسو ارزښت کمیږي او د تولید په پرتله د تقاضا کچه لوړیږي، چې له امله یې پیسې خپل ارزښت له لاسه ورکوي.
مجاهد روان کال کې د یاد بانک له لوري افغانستان په اړه اټکل شوي دوه سلنه انفلاسیون ته په اشارې ویلي، دا وضعیت د خوراکي توکو بیو د ثبات او د ملي اسعارو د پیاوړتیا له امله رامنځته شوی دی.
په ورته وخت کې اقتصادي کارپوهان وايي چې، د افغانستان اقتصادي برخه چې تر ډېره په بهرنیو مرستو تکیه وه اوس د طالبانو له بیا واکمنېدو راهیسې د هېواد ملي بودیجه له کورنیو سرچېنو پوره او تمویلېږي.
عام افغانان هم دا وضعیت لویه لاسته راوړنه او ښه مدیریت بولي خو د کاري فرصتونو د زیاتېدو په هیله دي.