تاند ( دوشنبه د لیندۍ ـ قوس ۱۷مه) د پښتونخوا ملي عوامي ګوند او د پاکستان اساسي قانون خوندیتوب غورځنګ مشر د افغانستان او پاکستان ترمنځ پر ډیورنډ کرښه د ټولو لارو پر تړل کېدو اندېښنه ښودلې.
محمود خان اڅکزی وايي، د پاکستان حکومت له هند سره واګه بندر پرانیستی خو له افغانستان سره یې ټولې لارې تړلې.
د اڅکزي او نورو پښتنو ملتپالو په باور د پاکستان او هند ترمنځ تېر دوبي کې د څو ورځې خپلمنځي توغندیزو بریدونو پرمهال هم واګه بندر پرانیستی و.
دوی وايي د واګه بندر ګټه د پاکستان پنجاب صوبې ته رسېږي چې، د دغه هېواد واک یې هم په لاس کې دی، خو له افغانستان سره د لارو او سوداګرۍ ګټه پښتنو ته رسېږي ځکه بندې دي.
د افغانستان پر مختلفو ولایتونو د پاکستان له هوايي بریدونو او د طالبانو له ځوابي حملې وروسته اسلام اباد پر ډیورنډ کرښه لارې وتړلې.
د دوی د دې ګام په غبرګون کې طالبانو هم دا لارې وتړلې او وايي چې پاکستان باوري ضمانتونه ور نه کړي، دا لارې به همداسې تړلې وي.
طالبانو د منځنۍ اسیا هېوادونو او د ایران له لارې له نورې نړۍ په تېره هند سره د سوداګرۍ هڅې هم ګړندۍ کړې دي.
د نړیوال بانک رپوټ وايي چې، له پاکستان سره د لارو بندېدو سره بیا هم تېر اکتوبر د افغانستان صادراتو وده کړې ده.