تاند ( یکشنبه د لیندۍ – قوس ۱۶مه) د قطر د بهرنیو چارو وزارت ویاند، مجید بن محمد الانصاري د افغانستان لپاره د ازبکستان له ځانګړي استازي عصمت الله ارګاشیف سره کتلي دي.
د قطر د بهرنیو چارو وزارت لیکلي چې دا کتنه د دوحې فورم ۲۳مې غونډې په څنډه کې شوې.
دواړو هېوادونو په دغه کتنه کې پر دوهاړخیزو اړیکو د بحث ترڅنګ د افغانستان په اړه هم خبرې کړې دي.
په دې تړاو د خپرې شوې خبرپاڼې له مخې، په دې کتنه کې همداراز د افغانستان په اړه د همکاریو پر پیاوړتیا هم خبرې شوې دي.
دا په داسې حال کې ده چې له تېرو څلورو کلونو راهیسې د افغانستان، قطر او ازبکستان ترمنځ اړیکې پراخې شوي او د بېلابېلو موضوعاتو د بحث لپاره د یو بل هېوادونو لوړپوړي چارواکو رسمي سفرونه هم کړي دي.
د یادونې وړ ده چې قطر له تېرو څو کلونو راهیسې د طالبانو حکومت ته سیاسي دفتر هم ورکړی و او همداراز ازبکستان او افغانستان بیا ۱۴۴ کیلومتره ګډه پوله لري.