تاند ( پنجشنبه د لیندۍ ـ قوس ۶مه) د افغانستان سولې لپاره د امریکا پخواني ځانګړي استازي، زلمي خلیلزاد د امریکا په واشنګټن کې د ملي ګارډ پر دوو سرتېرو شوی برید غندلی دی.
زلمي خلیلزاد ویلي چې دا برید ظالمانه دی او ټول فکر یې د ټپي شوو د ملي ګارډ سرتېرو کورنیو سره دی.
تېره شپه ناوخته سپینې ماڼۍ ته څېرمه په یوه وسله وال برید کې د امریکا د ملي ګارډ دوه سرتېري سخت ټپیان شول.
د دغه برید په تړاو یو ۲۹ کلن افغان نیول شوی دی.
د دغه برید په غبرګون کې د امریکا د تابعیت او مهاجرت خدماتو ادارې اعلان کړی چې د افغانانو ټولې مهاجرتي غوښتنې د نامعلومې مودې لپاره وځنډول شوې.
د برید شکمن کس، چې افغان دی، د امنیتي ځواکونو له خوا نیول شوی او دواړه ټپي سرتېري روغتون ته انتقال شوي دي چې روغتیايي حالت یې نازک ښودل شوی دی.