تاند ( پنجشنبه د لیندۍ ـ قوس ۶مه) د صنعت او سوداګرۍ وزیر نور الدین عزیزي ترکیې ته په سفر کې د ایکو سازمان د غونډې په څنډه کې د دغه هیواد د سوداګرۍ له وزیر عمر پولات سره د افغانستان او ترکیې د سوداګرۍ د زیاتوالي په اړه خبرې کړي دي.
د طالبانو یاد وزارت وايي، عزیزي له پولات سره د دواړو هیوادونو د سوداګرۍ د زیاتوالي، ترکیې ته د پنبې او ډبرو سکرو د صادرولو او په افغانستان کې د پانګونې د زیاتوالي په اړه خبرئ کړي او هغه ته یې د افغانستان د سفر بلنه هم ورکړې، څو په افغانستان کې د سوداګرۍ د پراختیا فرصتونه له نژدې وویني او وڅېړي.
سرچینه وايي، دوی د سوداګرۍ او پانګونې دیوې ګډې کمېټې پر جوړولو هوکړه کړې او ویلي یې دي چې، یاده کمېټه به په نژدې راتلونکي کې خپله لومړنۍ ناسته هم ترسره کړي.