تاند ( پنجشنبه د لیندۍ ـ قوس ۶مه) د کډوالو او بېرته راستنېدونکو چارو وزارت ویلي، چې روانه اونۍ د عراق او پاکستان له بندخونو ۴۰۳ تنه افغان کډوال راخوشې او هېواد ته راستانه شوي دي.
د طالبانو یاد وزارت کندهار او نیمروز ولایتونو کې د کډوالو ریاستونو د معلوماتو په اساس ویلي، له پاکستانه ۴۰۰ تنه افغان کډوال چې، د بند موده یې دوه میاشتې وه راخوشې او د سپین بولدک له لارې هېواد ته راستانه شوي دي.
دغه راز درې تنه کډوال له عراق څخه چې، د بند موده یې له ۵ تر ۸میاشتو وه، د نیمرزو له لارې هېواد ته را ستانه شوي دي.
یاد وزارت زیاته کړې چې، د همکارو بنسټونو له لورې راستنو شویو کسانو سره مرستې شوي او خپلو کورونو ته لیږدول شوي دي.