تاند (دوشنبه د لیندۍ ـ قوس ۳مه) افغانستان کې د طالبانو د حکومت د برېښنا شرکت ویاند قاري محمد صادق حقپرست ويلي،چې په راتلونکو دوو تر درېیو میاشتو پورې به د کابل برېښنا ۲۴ ساعته شي.
د حقپرست په وینا، دې لپاره د ترکمنستان او ازبکستان له لوري د ۵۰۰ کیلو ولټ دوه مزي غځول کېږي، چې له رارسېدو سره به د هېواد په برېښنا کې شاوخوا درې زره مېګاواټه زیاتوالی راشي.
نوموړی وایي، د ازبکستان د وارداتي مزي په فعالېدو سره به د کابل برېښنا بشپړه ۲۴ ساعته شي.
حق پرست زیاتوي، چې له ترکمنستانه د دویم مزي په رسېدو سره به د ټول افغانستان د برېښنا اړتیاوې پوره شي.
د برېښنا شرکت ویاند ټینګار کوي، چې هڅې روانې دي څو افغانستان په نږدې راتلونکي کې د برېښنا په برخه کې ځانبسیاينې ته ورسېږي.