تاند (یکشنبه د لیندۍ ـ قوس ۲مه) د پښتون ژغورنې غورځنګ د مرکزي کمېټې غړي ذکیم خان وزیر د پښتونخوا د اعلی وزیر په حواله خبر ورکړی، چې استخباراتي ادارو د پي ټي ایم اووه کسیز پلاویله امن جرګې څخه پورته کړی او دا مهال په اسلام اباد کې زنداني دی.
ذکیم خان وزیر پر خپله ایکسپاڼه د پښتونخوا اعلی وزیر مخاطب ګرځولی او لیکلي دي چې: “ستاسو مېلمانه د پېښور له زړه څخه د اسیرانو په څېر وتښتول شول خو تاسو یې مخه ونه نیوله.”
د ذکیم خان په خبره، دا د اعلی وزیر لپاره شرموونکې پېښه ده.
نوموړي د پښتونخوا اعلی وزیر بې صلاحیته بللی او پوښتنه یې کړې چې ” کوم وزیر؟ هغه څوک چې استخباراتي ادارې د ده تر واک لاندې سیمو ته د لارو د غلو په څېر ننوځي، خلک په رڼا ورځ تښتوي خو دی بیا هم ځان واکمن بولي.”
دا په داسې حال کې ده چې د بښنې نړیوال سازمان هم پرون شنبه د پاکستان له حکومت غوښتي چې د پښتون ژغورنې غورځنګ اووه کسیز پلاوی سملاسي ازاد او خپلو کورنیو ته ستون کړي.
یاد سازمان ټینګار کړی چې د جبري لادرکه کېدو عمل باید پای ته ورسېږي او د فعالانو خوندیتوب یقیني شي.
تېره اوونۍ د حنیف پښتین او نورالله ترین په ګډون د پي ټي ایم اووه غړي د پښتونخوا له امن جرګې نادرکه شول چې بالاخره نن یې د ځای درک ولګېد.