تاند (یکشنبه، د لیندۍ/ قوس ۲ مه) د هند د جمو او کشمیر دولتي تحقیقاتي ادارې (SIA) او پولیسو د شنبې په ورځ په کلګام کې د ډاکټر مظفر احمد رتهر د نیولو حکم اعلان کړ. نوموړی د ډیلي د چاودنې په قضیه کې یو مهم متهم بلل کېږي.
ډاکتر مظفر، چې اصلاً د قاضي ګند اوسېدونکی دی، د قضیې اصلي تورن بلل کېږي او باور کېږي چې تېر اګست له هنده وتلی او تښتېدلی دی. د سرچینو د معلوماتو له مخې، ښايي دا مهال په افغانستان کې وي. سرچینې زیاتوي چې نوموړي د جیش محمد د شبکې د بهرنیو لارښوونکو او د هند په بېلابېلو ایالتونو کې د “سپینو کالرو ترهګرې شبکې” ترمنځ د ارتباط په ټینګولو کې مهم رول لوبولی دی.
د جمو او کشمیر پولیسو له دې مخکې د هغه د نیولو لپاره د انټرپول له ادارې د سور حکم (Red Corner Notice) غوښتنه کړې وه.
ډاکتر مظفر له الفلاح پوهنتون سره هم تړاو لري، هغه پوهنتون چې د ډیلي د چاودنې او ورپسې د سپینو کالرو ترهګرې شبکې تر پلټنو وروسته د امنیتي ادارو تر څارنې لاندې و.
د هغه ورور، ډاکتر عدیل رتهر، لا دمخه نیول شوی او د جیش محمد له شبکې سره د تړلي بینالایالاتي ترهګریزې ډلې بل مهم همکار بلل کېږي. نوموړی د لال قلعه د موټربمي چاودنې په قضیه کې هم مطلوب دی.
د ډاکتر مظفر پر ضد دا اقدام داسي مهال ترسره کېږي چې له ډیلي سره نژدې د لال قلعه ترڅنګ د نومبر په ۱۰مه بمي چاودنې، چې ۱۳ کسان پکې ووژل شول او د ۲۹۰۰ کیلو ګرامه چاودیدونکو موادو له کشف وروسته، د سپینو کالرو د ترهګرۍ پراخه شبکه بربنډه شوه.