تاند (شنبه، د لیندۍ/ قوس لومړۍ) د مکسیکو د نامتو انځورګرې، فریدا کالو (Frida Kahlo)، یو انځور د ښځینه هنرمندانو په پلورل شویو اثارو کې تر ټولو د قیمتي اثر ریکارډ مات کړ.
دا انځور، چې فریدا کالو په ۱۹۴۰ کال کې ایستلی و، د پنجشنبې په ورځ (د نوومبر ۲۹ مه) د نیویارک په یوه هنري لیلام کې په ۵۴ میلیون او ۷۰۰ زره ډالرو وپلورل شو.
په دې انځور کې، فریدا کالو ځان د یوې بسترې پر سر په پراته حالت کې انځور کړی دی.
تر دې مخکې د هغې تر ټولو ګرانه پلورل شوی انځور «دیګو او زه» وه چې په ۲۰۲۱ کال کې په ۳۴ میلیون او ۹۰۰ زره ډالرو وپلورل شو. دا اثر فریدا کالو د خپل مېړه، دیګو ریورا، ترڅنګ انځوروي.
راپورونه وايي چې د فریدا کالو ځینې نور آثار هم په شخصي معاملو کې په لوړ قیمت پلورل شوي دي.
د مکسیکو حکومت د فریدا کالو ټول آثار د هېواد «هنري میراث» اعلان کړي دي؛ له همدې امله د دې انځورګرې آثار په مکسیکو کې دننه نه شي پلورل کېدای او د له منځه وړلو اجازه یې هم نشته.
هغه انځور چې په نیویارک کې وپلورل شو، د هغې له هغو لږو اثارو څخه دی چې خاوند یې له مکسیکو څخه دباندې اوسي.
د فریدا کالو هغه نقاشي چې پکې یې ځان په پراته حالت انځور کړی، د یوه شخصي ټولګې له لوري لیلام ته وړاندې شو، او د اثر د مالک هویت نه دی افشا شوی.
د هنر کارپوهان اندېښنه لري چې دا تابلو به د پنجشنبې د ورځې له خرڅلاو وروسته یو ځل بیا د خلکو له سترګو پټ شي. دا اثر وروستی ځل د ۱۹۹۰م لسیزې په پای کې عامو خلکو ته ښکاره شوی و.
دا په داسې حال کې ده چې په نیویورک، لندن او بروکسل کې د ګڼو موزیمونو له لوري د دې اثر د نندارې لپاره رسمي غوښتنلیکونه ثبت شوي دي.
په دې نقاشۍ کې فریدا کالو په داسې ډول پر بستر پرته انځور شوې چې د هغې پر سر یو اسکلېټ ولاړ دی، او بستر یې د وريځو تر منځ تصویر شوی دی.
د فریدا کالو ژوند هغه مهال بدل شو چې په ۱۸ کلنۍ کې د یوه بس د ټکر له امله سخته ټپي شوه. هغه سخته ټپي شوه او وروسته یې څو سخت جراحي عملیات تېر کړل. هغه د رغېدو په دوران کې انځورګري پیل کړه.
فریدا کالو په ۱۹۵۴م کال کې، په ۴۷ کلنۍ کې ومړه. هغې د دې مخالفت کاوه چې د هغې هنر دې “سوریالیستي” وبلل شي، او یو ځل یې ویلي و:
“ما هېڅکله خوبونه نه دي انځور کړي، ما خپله واقعیت کښلی دی.”