تاند (سه شنبه د لړم ــ عقرب ۲۷مه) د طالبانو د اطلاعاتو کلتور وزارت خبر ورکړی، چې د یاد وزارت د کلتور او هنر معین مولوي عتیق الله عزیزي کابل کې د جاپان سفیر ماساموتو کینیچي د کلتوري همکاریو او تاریخي میراثونو ساتنې په اړه خبرې کړي.
عزیزي د افغانستان تاریخي اثارو او ابداتو بیارغونې او ساتنې برخه کې د جاپان هڅې ستایلې او د هېواد کلتوري میراثونو ساتنې لپاره یې د لا زیاتو مرستو غوښتنه کړې.
د جاپان سفیر هم د تاریخي میراثونو ساتنې برخه کې د طالبانو هڅې د پام وړ بللي او ویلي یې دي، د افغانستان لرغونی تمدن نړیوال اهمیت لري.
نوموړي زیاته کړې، د تاریخي اثارو ساتنه یوازې د افغانستان حکومت نه بلکې د ټولو هېوادونو ګډ مسؤولیت دی.