تاند ( دوشنبه د لړم ـ عقرب ۲۶مه) چینایي رسنیو راپور ورکړی، چې د چین سرې میاشتې بشردوستانه پرګرام له لارې یې د زړه په ناروغۍ اخته لسګونه افغان ماشومانو درملنه کړې او لسګونه نور یې چین ته د انتقال په نوبت کې ځای لري.
د چین شینهوا خبري اژانس خبر ورکړی، چې د ۲۰۱۸کال راهیسي تر اوسه لسګونه افغان ماشومان د زړه جراحي لپاره د چین بېلابېلو ښارونو ته انتقال شوي او یوازې په ۲۰۱۷ او ۲۰۱۸ کلونو کې شین جیانګ کې د نږدې ۱۰۰ ماشومانو درملنه شوې ده.
سرچینه وایي دا په داسې حال کې ده، چې وروستیو کې د چیني متخصصیونو ټیمونه هم کابل ته راغلي، څو په کور دننه هم د تداوۍ پروسې ته دوام ورکړي.
د یادونې ده، چې د چین ترڅنګ المان هم د هغو هېوادونو له دلې ده، چې د افغان ماشومانو تداوي برخه کې فعاله ونډه لري او هر کال د لسګونه اړمنو ماشومانو درملنه کوي.
په ورته مهال د افغاني سرې میاشتې ټولنې ویلي، د زړه په ناروغیو اخته شاوخوا ۱۵زره افغان ماشومان یې ثبت کړي چې درملنې ته په تمه دي.