تاند (شنبه د لړم ـ عقرب ۲۴مه) افغان ابدالیانو د سریلانکا الف لوبډلې د ۱۷۱ منډو هدف په ځواب کې بهترینه توپوهنه وکړه او یاد هدف یې د خپلو ۷ لوبغاړو په زیان سره ترلاسه او لوبه یې وګټله.
افغان لوبډلې دې سره د روان کال ځوانانو اسیا جام سیالیو کې خپل سفر په بریا پیل کړ.
صدیق الله اتل د سریلانکا الف لوبډلې پر وړاندې روانه لوبه کې بهترینه وکړه او په ۲۲ توپونو یې چټکه نیمه سلیزه بشپړه کړه.
دا په شل اوریزو سیالیو کې د نوموړي ۲۰مه او د ځوانانو په اسیا جام سیالیو کې (له تېر کال راهیسې) شپږمه پرله پسې نیمه سلیزه ده.
د نوموړي ترڅنګ عمران میر هم غوره توپوهنه وکړه او په ۲۱ توپونو یې ۳۴ منډې جوړې کړې.
په توپ اچونه کې بیا بلال سمېع څلور سریلانکایي لوبغاړي اوټ کړل، غضنفر ۳ او احمدزي یو سریلانکایي لوبغاړی اوټ کړ.
افغان لوبډله به د یادو سیالیو په ترڅ کې خپله دوهمه لوبه د راتلونکې دوشنبې په ورځ د بنګله دېش الف لوبډلې پر وړاندې ترسره کړي.