تاند (شنبه، د لړم/ عقرب ۲۴ مه) ایراني رسنۍ وايي، د افغانستان د صنعت او سوداګرۍ وزیر نورالدین عزیزي د افغانستان له یو اقتصادي پلاوي سره یو ځای د نیمروز ولایت د میلك سرحدي بندر له لارې د ایران خاورې ته داخل شو او د سیستان او بلوچستان د والي منصور بیجار او یو شمېر ولایتي مسوولانو له لوري یې هرکلی وشو.

د تسنیم خبري اژانس د راپور له مخې، د سفر د اجنډا له مهمو برخو څخه د اقتصادي زیربناوو لیدنه او د ایران او افغانستان په ګډه اقتصادي ناسته کې ګډون یاد شوی، هغه ناسته چې ټاکل شوې نن ترسره شي.

د ایران او افغانستان ګډه اقتصادي غونډه د افغانستان د صنعت او سوداګرۍ وزیر، د سیستان او بلوچستان د والي او نورو ولایتي چارواکو په ګډون د ایران په هرمند ولسوالۍ کې جوړېږي.

په دې ناسته کې به د والي منصور بیجار او د ولایت د اقتصادي او عمراني مسوولانو په ملتیا د دواړو هېوادونو ترمنځ د سوداګریزو اړیکو د پراختیا لارې او د سوداګرۍ پر وړاندې د خنډونو لرې کولو لارې چارې وڅېړل شي.

دغه لیدنه په داسې حال کې کېږي چې د چابهار ستراتیژیک بندر — چې نړیوالو بازارونو ته د افغانستان د رسېدو لنډه او اقتصادي لاره ده — د دواړو هېوادونو په راتلونکو همکاریو کې مهم رول لري. د دې ناستې جوړېدا د سیمه‌ییزو همکاریو د پیاوړتیا او د ګډو اقتصادي ظرفیتونو د عملي کولو لپاره نوی ګام بلل کېږي.