تاند (دوشنبه د لړم ـ عقرب ۱۹مه) د طالبانو د حکومت د کډوالو ستونزو ته د رسېدنې عالي کمېسیون ویلي، په تېرو ۸ میاشتو کې یو میلیونه ۱۷۷زره افغان کډوال هېواد ته راستانه شوي.
د یاد کمېسیون ویاند مولوي احمدالله وثیق ویلي، دغه شمېر کډوال له ایران او پاکستان څخه په جبر ایستل شوي.
وثیق ویلي، له ګاونډیو هېوادونو د کډوالو ایستلو لړۍ لاهم دوام لري.
نوموړي د کډوالو له نړیوالو بنسټونو غوښتي، چې له ایران او پاکستان څخه د کډوالو جبري ایستلو برخه کې فشار راوړي، څو کډوال د یوه مشخص میکانیزم له لارې افغانستان ته ستانه کړای شي.
دا په داسې حال کې ده، چې دې وروستیو کې له ایران او پاکستان څخه د کډوالو بېرته راستنېدنې لړۍ چټکه شوې او هره ورځ زرګونه کسان هېواد ته راستنول کېږي.