تاند (دوشنبه د لړم ـ عقرب ۱۹مه) بادغیس کې د طالبانو امنیه قومندانۍ له لوري خپره شوې خبرپاڼه کې راغلي چې، د خوشه یي ماین دا چاودنه پرون یکشنبه مازدیګر مهال د بالامرغاب ولسوالۍ پنیرک سیمه کې شوې ده.
خبرپاڼې لیکلي چې، په دغه چاودنه کې دوه ماشومان وژل شوي دي.
د سرچینې په حواله دغو ماشومانو د مالونو څرولو په مهال دا ماین له موندلو وروسته اور ته اچولی او چاودنه یې کړې ده.
افغانستان یو له جګړه ځپلو هېوادونو دی چې، په یو شمېر سیمو کې اوس هم خښ شوي ماینونه د خلکو ژوند ګواښي او وخت ناوخته پر ماشومانو او عامو خلکو چاودي.
عام خلک له طالبانو هیله لري چې، جګړه ځپلو سیمو کې خښ شوي ماینونه وباسي څو راتلونکي کې خلک د ناچاوده ماینونو له ګواښه خوندي شي.