تاند (یکشنبه د لړم ـ عقرب ۱۸مه) د پاکستاني رسنیو د راپورونو له مخې د پاکستان ملي اسامبلۍ ته په اساسي قانون کې د ۲۷م تعدیل داسې مسوده وړاندې شوې، چې له مخې به یې هلته د پوځ مارشال د ټول عمر لپاره مارشال وي او امتیازات به یې ترلاسه کوي.
دغه مسوده چې پرون شنبه سنا جرګې ته وړاندې شوې او لا وروستۍ شوې نه ده، د پاکستان په پوځي برخه کې پنځه لوی بدلونونه رامنځته کوي.
بدلونونه به څه وي؟
– د پوځ مشر به له دې وروسته د دفاعي ځواکونو د مشر په توګه پېژندل کیږي.
– د لوی درستیزانو د ګډې کمېټې پوسټ به له منځه ځي.
– د ملي سټراټیژیکې قوماندانۍ پوسټ به رامنځته کیږي چې مشر به یې د دفاعي ځواکونو د مشر په سپارښتنې د لومړي وزیر لخوا ټاکل کیږي.
– د پاکستان ولسمشر به د لومړي وزیر په مشورې د پوځ، هوايي او سمندري ځواکونو مشران ټاکي.
– د پوځ پنځه ستورو رتبو لرونکو افسرانو ته به د اساسي قانون د ټول عمر ملاتړ ورکول کیږي.
د پاکستان اپوزوسیونو او مدني فعالانو پر دغه تعدیل نیوکه کړې او ویلي یې دي چې، دا بدلونونه به په دغه هېواد کې د واک تله لا د پوځ پر لور درنه او ملکي ادارې به لا کمزورې کړي.