تاند (پنجشنبه د لړم ـ عقرب ۱۵مه) د طالبانو د حکومت ویاند ذبیح الله مجاهد د پاکستاني ځواکونو له خوا پر سپین بولدک برید تایید کړ.
نوموړی وايي، دوی د مذاکراتو په احترام او د ملکي خلکو د مرګ ژوبلي مخنیوي په موخه تر اوسه کوم غبرګون نه دی ښودلی.
د طالبانو ویاند اعلان وکړ، چې د مذاکراتو په تیره ناسته کې د اوربند د غځیدو او د تیري پر نه کیدو موافقه شوې وه، خو پاکستاني ځواکونو یوځل بیا سپین بولدک کې برید کړی.
هغه وایي تر اوسه دوی د دې برید پر وړاندې غبرګون نه دی ښودلی.
تر دې وړاندې د کندهار له سپین بولدک څخه ځايي سرچینو وویل ، چې پاکستاني پوځیانو په سپین بولدک دروازه باندې پر طالبانو ډزې کړي او د افغانستان لوري ته یې هاوانونه ویشتلي دي.
د سرچینو په وینا سپین بولدک ولسوالۍ کې ځايي خلکو د جګړې له ډاره هټۍ او کورونه پرېږدي او خوندي سیمو ته ځانونه رسوي.
دا برید داسې مهال د پاکستان له لوري ترسره کېږي چې، تازه نن په ترکیه کې د دواړه لوریو ترمنځ د خبرو اترو درېیم پړاو پیل شو او په دوهم پړاو خبرو کې هم د اوربند پر دوام هوکړه شوې وه.