تاند (چهارشنبه د لړم ـ عقرب ۱۴مه) د سرچینو په حواله ټاکل شوې د طالبانو او پاکستان ترمنځ د خبرو درېیم پړاو سبا پنجشنبه پیل شي.
د رسنیو د راپورونو له مخې د طالبانو او پاکستان استخباراتي مشرانو ترمنځ د خبرو نوې ناسته د ترکیې په کوربتوب پیلېږي.
سرچینې وایي، ټاکل شوې ده چې د افغانستان د استخباراتو مشر ملا عبدالحق وثیق او د پاکستان د استخباراتو مشر عاصم مالک د روان میلادي کال د نومبر په ۶مه په ترکیه کې د خبرو اترو مشري وکړي.
دغه ناسته به د قطر او ترکیې د چارواکو په منځګړتوب ترسره شي.
د دې ناستې موخه د دواړو هېوادونو ترمنځ پر بېلا بېلو موضوعاتو بحث او تفاهم دی.
یاده ناسته داسې مهال ترسره کېږي، چې دواړو هېوادونو تر منځ اړیکې د وروستیو امنیتي پېښو له امله ترینګلي شوي دي.