تاند (سې شنبه د لړم ـ عقرب ۱۳مه) دا وروسته له هغې ده چې د الوتکو انجنیرانو له کاره لاس واخیست او د الوتنو د تخنیکي اجازې ورکولو بهیر یې په ټپه ودراوه.
د راپورونو له مخې، د دوشنبې له ماښام وروسته د پاکستان په کچه ټول پروازونه درېدلي دي.
تر اوسه ۱۲ نړیوالې الوتنې ځنډېدلې دي، چې زیات مسافر پکې د عمرې ادا کوونکي دي.
د مالوماتو له مخې د الوتکو د انجنیرانو ټولنې ویلي، دوی به تر هغه وخته کار ته بېرته ستانه نه شي څو، د پاکستان د دغه دولتي هوايي شرکت د عمومي رییس چلند بدل نه شي.
د دوی په وینا، له انجنیرانو غوښتنه کېده چې د خوندیتوب اصولو خلاف الوتنې تایید کړي، خو هغوی دا کار د مسافرو د ژوند له خطر سره تړلی بللی دی.
ادارې د انجنیرانو پر ضد د سختو اقداماتو امر کړی او ویلي یې دي چې دا اعتصاب د PIA د خصوصي کولو د پروسې د ګډوډولو هڅه ده.
د یاد شرکت ویاند ویلي، د لازمي خدماتو قانون پلی دی او د کار پرېښودل قانوني جرم ګڼل کېږي.