تاند (سې شنبه د لړم ـ عقرب ۱۳مه) د طالبانو د حکومت د ریاست الوزراء اقتصادي معاونیت، د اقتصادي کمېسیون نوبتي غونډه کې د کانونو او پټرولیم وزارت له لوري د کان کیندنې پروژو کې له کورنيو سرچېنو څخه د گټې اخیستنې پالیسۍ مسوده تایید شوه.
د طالبانو یاد معاونیت زیاته کړې، چې تایید شوې مسوده د وروستۍ پرېکړې لپاره اقتصادي کمېسیون ته وړاندې شوه.
سرچېنې زیاته کړې، د دې پالیسۍ په تطبیق سره به د کان کیندنې برخې د کاري ځواک فني او حرفوي مهارتونه لوړ، د کان کیندنې په پروژو کې به دوامداره کاري فرصتونه رامنځته، د کان کیندنې په پروژو کې به له کورنیو سرچینو څخه گټه اخیستنه زیاته او پر وارداتو به تکیه راکمه شي.
د سرچینې په خبره دغه راز د کورنیو صنايعو او سیمه ییز اقتصاد ودې ته زمینه برابره شي.
افغانستان چې د کانونو له اړخه بډایه هېواد دی، افغان چارواکو یې د کیندنې پروسه کې د روڼتیا هڅې ګړندۍ کړي چې په مټ یې د ګڼو بنسټیزو پروژو چارې چټکې شوي.