تاند ( دوشنبه د لړم – عقرب ۱۲مه) د طالبانو دفاع وزارت اړوند د ۲۰۹ الفتح قول اردو ژغورنې او انجینري ټیمونو د هېواد په شمال زون کې د تاشقرغان تنګي هغه عمومي لار چې د زلزلې له امله بنده شوې وه، بېرته د ترافیکو پرمخ خلاصه کړه.
د یادې لار له بندېدو سره، ګڼ هېوادوال هلته ایسار پاتې وو.
مسوولان وایي ، د ژغورنې ټیمونو په وخت اقدام وکړ، بند پاتې کسان یې وژغورل او ټپیان یې د عاجلو مرستو لپاره اړوندو روغتونونو ته ولېږدول.
د طالبانو ملي دفاع وزارت ویلي، د اړتیا په صورت کې به د نورو سیمو د پاکولو او زیانمنو ته د مرستو رسولو لپاره چمتو پاتې شي.
بل لورته عامې روغتیا وزارت ویلي چې د تېرې شپې زلزلې په پایله کې تر ۲۰ ډېر کسان مړه او ۳۲۰ تنه ژوبل شوي دي.
د عامې روغتیا وزارت ویاند ډاکتر شرافت زمان زیاتوي، چې دا شمېرې لومړنۍ دي او په خبره یې د ژغورنې او روغتیا ټیمونه سیمې ته رسېدلي دي.
تر دې وړاندې په ختیځ کونړ ولایت کې زلزلې زرګونه کسانو ته مرګ ژوبله واړوله چې له امله یې خلک اوس هم بې سرپناه او په سختو حالاتو کې دا سوړ ژمی تېروي.