تاند (پنجشنبه د لړم ـ عقرب ۸مه) ‏د هند د بهرنیو چارو وزارت ویلي، نوی ډیلي چمتو دی چې له افغانستان سره د اوبو د مدیریت او د برېښنا د تولید د پروژو په برخه کې همکاري وکړي.

د دغه وزارت ویاند رندیر جیسوال نن یوه خبري غونډه کې وویل، هند د افغانستان له هڅو ملاتړ کوي څو خپلې اوبه په دوامدار ډول اداره کړي او د اوبو له سرچینو د برېښنا د تولید لپاره ګټه واخلي.

جيسوال د کونړ پر سیند د احتمالي بندونو جوړولو یادونه هم وکړه او ویې ویل چې، دواړه هېوادونه د اوبو په برخه کې د اوږدې همکارۍ تاریخ لري.

سلما بند چې د تېر جمهوري نظام پر مهال جوړ شوی، ښکاره مثال ګڼل کېږي.

دا په داسې حال کې ده چې د طالبانو د اوبو او انرژۍ وزیر ملا عبدالطیف منصور څو ورځې وړاندې په یوه غږیز پیغام کې ویلي وو، افغانان د خپلو اوبو د مدیریت حق لري.

هغه ټینګار کړی و چې پر کونړ سیند د بند جوړولو لپاره له کورنیو او بهرنیو شرکتونو سره خبرې روانې دي، خو ویې ویل چې دغه بند به د پاکستان په زیان نه وي.

په همدې حال کې طالبانو تر اوسه د دغې ژمنې لپاره هېڅ بودیجه، عملي پلان او یا د شوې سروې جزییات نه دي څرګند کړي.

کارپوهان وايي، د کونړ پر سیند د بند جوړول یوه لویه او پېچلې ملي پروژه ده چې پراخو بشري سرچینو، لوړو مالي امکاناتو او اوږدمهاله تخنیکي پلان ته اړتیا لري.

بل لورته عام خلک هم د اوبو د مدیریت برخه کې پر چټکتیا ټینګار کوي او وایي، چې حکومت دې ژر د وطن اوبه مهار کړي.