تاند (پنجشنبه، د لړم/ عقرب ۸ مه) د افغانستان او پاکستان د روان کړکېچ په منځ کې د هند د بهرنیو چارو وزارت ویاند رندهیر جایسوال د پنجشنبې په ورځ وویل چې هند د افغانستان د خپلواکۍ، ځمکنۍ بشپړتیا او حاکمیت ملاتړ ته ژمن دی.
هغه دا څرګندونې د کابل او اسلاماباد د تاوتریخجنو اړیکو او د ډیورند کرښې په اوږدو کې کړکېچونو ته په اشارې وکړې.
په وروستیو اوونیو کې د پاکستان او افغانستان اړیکې سختې خرابې شوې دي. دواړه هېوادونه پر یو بل د بریدونو او د ترهګرو د ملاتړ تورونه لګوي.
له اوربند وروسته، په ترکیه کې خبرې پیل شوې وې تر څو داسې یو میکانیزم جوړ شي چې د دواړو خواوو ژمنې وڅاري چې ایا دوی د یو بل په خاوره کې د بریدونو د مخنیوي په برخه کې عملي ګامونه اخلي که نه.
په یوه خبري ناسته کې د هند د باندنیو چارو وزارت له ویاند څخه پوښتنه وشوه چې ولې پاکستان د ترهګریزو بریدونو پړه پر یوې ډلې «ټي ټي پي»، چې اسلام اباد یې د هند نیابتي بولي، اچوي؟ او د پاکستان دفاع وزیر خواجه آصف دا ولې ویلي چې کابل د هند په استازیتوب یو نیابتي جنګ پر مخ وړي؟
جایسوال په ځواب کې وویل:
«ما په خپله تیره خبري ناسته کې د دې موضوع په اړه د هند دریځ روښانه کړی و. پاکستان له دې امله غوسه دی چې افغانستان د خپلې خاورې پر سر خپل حاکمیت عملي کوي. پاکستان داسې انګیري چې ګواکي له پولو هاخوا د ترهګرۍ د ترسره کولو حق لري، خو د هغه ګاونډیان دا عمل نه شي منلی.»
هغه زیاته کړه:
«هند د افغانستان د حاکمیت، ځمکنۍ بشپړتیا او خپلواکۍ د ملاتړ په اړه خپله ژمنه بیا تائیدوي.»
کله چې له ویاند څخه د هند د هغو پروژو په اړه پوښتنه وشوه چې اوس هم په افغانستان کې روانې دي، ده د افغانستان د بهرنیو چارو وزیر امیرخان متقي وروستي سفر ته اشاره وکړه چې هند ته یې کړی و.
جایسوال وویل:
«د دې سفر په ترڅ کې د دواړو هېوادونو ګډه اعلامیه خپره شوې وه، چې پکې دا څرګنده شوې وه چې هند چمتو دی له افغانستان سره په هغو هڅو کې مرسته وکړي چې د اوبو د سرچینو د پایدار مدیریت لپاره ترسره کېږي — په ځانګړي ډول د برېښنا کوټونو د (هایډروالېکټریک) پروژو په برخه کې.»