تاند (شنبه د لړم ـ عقرب ۳مه) د اسلام آباد سترې محکمې د پاکستان د پخواني لومړي وزير او د PTI د مشر، عمران خان د ایکس اکونټ د بندولو غوښتنه د نومبر په ۴مه د اورېدنې لپاره ټاکلې ده.
ياده عريضه يوه پاکستاني کړې، چې پکې ادعا شوې، عمران خان که څه هم په بند کې دی، خو له ایکس حسابه یې لا هم د پاکستاني قانون او ټولنیز نظم خلاف محتوا خپرېږي.
عارض غوښتنه کړې چې دغه حساب دې بند او له هغه خپاره شوي پوسټونه دې لرې شي.
محکمې د اکټوبر په سر کې عمران خان ته خبرداری هم لېږلی دی.
د پاکستان د سایبري جرمونو ادارې له هغه په یو پوښتنلیک کې پوښتلي: «که تاسو په زندان کې ياست، نو ستاسې د ایکس حساب څوک او له کوم ځایه چلوي؟»
که څه هم عمران خان دا مهال د زندان له دننه د سياسي فعاليت اجازه نه لري، خو د هغه ایکس یا پخوانی ټویټر حساب وخت ناوخت د پاکستان د کورني سياست ترڅنګ، د افغانستان او پاکستان د اړيکو په اړه هم نظرونه خپروي.
تر دې وړاندې هم یو شمېر راپورونه ورکړل شوي، چې د عمران خان ایکس حساب له بهره د یوه منظم مطبوعاتي ټیم له لوري اداره کېږي او هغه څه چې پکې خپرېږي، په عمران خان او PTI پورې اړه لري.