تاند (شنبه د لړم ـ عقرب ۳مه) د ترکیې په لویدیځه ساحلي سیمه کې د کډوالو د یوې کښتې ډوبېدو له امله لږ تر لږه ۱۴ کسان وژل شوي دي.
د راپورونو له مخې د ۱۸ کسانو له ډلې، یوه افغان په لامبو وهلو ځان وچې ته ایستلی او ژغورل شوی دی.
د ترکیې چارواکو ویلي، دغه افغان د شپې له یوې بجې وروسته وچې ته وتلی او تر رسېدو وروسته یې چارواکي خبر کړي دي.
د ترکیې چارواکو ویلي، چې یو بل کس هم ځان ژغورلی او د پاتې دوو د لټون هڅې روانې دي.
د معلوماتو له مخې، ټول ۱۸ کسان په کښتۍ کې سپاره وو، خو کښتۍ له روانېدو څو شېبې وروسته اوبو ډوبه کړې ده.
تراوسه د یاد افغان د هویت په تړاو معلومات نه دي خپاره شوي.
د جمهوریت له سقوط او د طالبانو له واکمنۍ وروسته په قاچاقي مرګونو لارو چې، منزل ته رسېدل یې کله ناکله په مرګ تمامېږي، سلګونه زرو افغانانو هېواد پرېښی دی.