تاند (یکشنبه د تلې ـ میزان ۲۷مه)د پاکستان د بهرنيو چارو وزير اسحاقډار د کابل او اسلاماباد ترمنځ د اوربند هوکړې هرکلی کړی او دا يې د «سمې لارې پر لور لومړنی ګام» بللی دی.
اسحاق ډار ويلي، دا هوکړه د سيمې د ثبات او متقابل تفاهم لپاره مهم فرصت برابروي. نوموړي د قطر او ترکيې هېوادونو د منځګړتيا رول ستايلی او د هغوی هڅې یې د يادې هوکړې په ترلاسه کولو کې اغېزمنې بللې دي.
د پاکستان د بهرنيو چارو وزير هيله څرګنده کړې چې د ترکيې په کوربتوب راتلونکې ناسته کې به يو ګډ نظارتي ميکانيزم جوړ شي، څو د هوکړې د عملي کېدو بهير وڅاري او د دواړو هېوادونو ترمنځ د باور فضا نوره هم پياوړې کړي.
بل لورته ايران هم د افغانستان او پاکستان ترمنځ د سملاسي اوربند په تړاو مثبت غبرګون ښودلی او دا هوکړه يې «ګټوره او رغوونکې» بللې ده.
د افغانستان په چارو کې د ايران د بهرنيو چارو وزارت ځانګړي استازي محمدرضا بهرامي پر خپله اېکس پاڼه ليکلي: “د افغانستان او پاکستان ترمنځ د اوربند او د اختلافاتو د حل لپاره د سياسي خبرو پرېکړه يوه «ګټوره، رغوونکې او د پام وړ اقدام» دی. “
بهرامي ټينګار کړی، چې د سيمې د ټولو هېوادونو ګډه ګټه د ارامۍ، ثبات او امنيت په پياوړتيا کې نغښتې ده.
دا په داسې مهال ده، چې د تېرې يوې اوونۍ په اوږدو کې د ايران چارواکو درې ځله د کابل او اسلاماباد ترمنځ د تاوتريخوالي د زياتېدو په تړاو غبرګون ښودلی او له دواړو لوريو یې د زغم او د شخړو د حل لپاره د ډيپلوماسۍ د لارې کارولو غوښتنه کړې وه.