تاند (پنجشنبه د تلې ـ میزان ۲۴مه) د افغانستان پخواني ولسمشر حامد کرزي د پاکستان له لوري د افغانستان پر بېلابېلو سیمو هوايي او ځمکني بریدونه په کلکو ټکو وغانده.

هغه په خپله اېکسپانه لیکلي چې، دغه بریدونه د ښځو او ماشومانو په ګډون د یو شمېر هېوادوالو د وژل کېدو او ټپي کېدو لامل شوي دي.

کرزي دا بریدونه د افغانستان پر خاوره څرګند تجاوز او د نړیوالو اصولو او قوانینو ښکاره سرغړونه وبلله.

پخواني ولسمشر، د قربانیانو له کورنیو سره د خواخوږۍ څرګندولو ترڅنګ، یو ځل بیا ټینګار وکړ چې پاکستان د خپلو غیرمنطقي تګلارو له پایلو سره مخ دی او د افغان ولس پر وړاندې په بریدونو نه شي کولی له دې وضعیت ځان خلاص کړي.

هغه زیاته کړه چې پاکستان باید درک کړي، چې افغانان د خپل وطن او خاورې په دفاع کې یو موټی او یو غږ دي.

هغه لیکلي: “د پاکستان په خیر کې ده چې له تجاوز ډډه وکړي، خپلې زیانمنې تګلارې له سره وڅېړي او له افغانستان سره د ښه ګاونډیتوب او نړیوالو اصولو پر بنسټ دوستانه او متمدنه اړیکې رامنځته کړي.”

بل لورته تهران کې د افغانستان پخواني سفیر عبدالغفور لېوال پر افغانستان د پاکستان د دوامدارو بریدونو په غبرګون کې له هېوادوالو غوښتي چې، له هر منبر او هرې وسیلې څخه د ملي یووالي د پیاوړتیا او د خلکو د ویښتابه لپاره ګټه واخلي.

هغه په خپله اېکسپاڼه لیکلي چې ان هغه منبرونه او غږونه که څه هم مغرضانه وي، خو که د پوهاوي، بیدارۍ او د وطن پالنې د احساس د راپارولو په موخه وکارول شي، دا یو شرافتمندانه اقدام دی.

پر پلازمېنې کابل د پاکستان وروستيو هوايي بریدونو د سیاسي فعالانو او خلکو ترمنځ د تندو غبرګونونو او نیوکو نوې څپه را منځته کړې ده.

له تېرو لسو ورځو په کمه موده کې پاکستان دوه ځلې د افغانستان پر پلازمېنې کابل هوايي بریدونه کړي، چې یوازې د تېرې ورځې په هوايي بریدونو کې لسګونه ملکي وګړي مړه او ټپیان شوي دي.