تاند (پنجشنبه د تلې ـ میزان ۲۴مه) د ایران ولسمشر مسعود پزشکیان وايي د افغانستان او پاکستان ترمنځ روان تاوتریخوالي او جګړې د تهران په ګډون د سیمې ټول هېوادونه اندېښمن او اغېزمن کړي دي.
پزشکیان زیاتوي، ایران به خپل اسلامي مسوولیت ته په پام د دواړو ملګرو او دوستو هېوادونو ترمنځ د تاوتریخوالي کمولو، خبرو او اړیکو پیاوړتیا لپاره ټوله وړتیا او تلاش وکاروي.
پزشکیان پرون مازیګر یوه غونډه کې دا اندېښنه ښودلې ده.
له نږدې څلور ورځو ځنډ وروسته پرون چهارشنبه د کندهار په سپین بولدک کې د پاکستان برید سره د طالب ځواکونو په ځوابي حملې سره بیا جګړه ونښته او وروسته د پاکستان الوتکو کابل کې څو هدفونه په نښه کړل.
خواله رسنیو کې ویډيو ښيي چې یوه برید کې پاکستان د تېل پمپ ویشتی او پکې ولس ته مرګ ژوبله اوښتې ده.
د پاکستان او طالبانو حکومت ترمنځ اوسنی تاوتریخوالی کابل او پکتیکا کې د اسلام اباد هوايي بریدونو وروسته پیل شول. طالبانو د دې برید په ځواب کې پنځه ورځې مخکې له ډیورنډ کرښې سره مختلفو سیمو کې د پاکستان پوځي مرکزونه په نښه کړل او د ۵۸ پوځیانو د وژلو او ۳۶ نورو د ټپي کولو خبره یې وکړه.
پاکستان د طالبانو حکومت د دغه هېواد ضد وسلوالو په ملاتړ تورنوي او وايي کابل کې یې پرونی او د تېرې پنجشنبې ورځې هوايي بریدونه هم د همدې وسلوالو پر مشرانو کړي دي.
په مقابل کې طالبان دا تور ردوي او پاکستان د افغانستان پرضد د داعش په ملاتړ تورنوي.