تاند (چهارشنبه، د تلې/ میزان ۲۳ مه) پاکستان وايي، پرېکړه یې کړې چې له نن ماښام (له ۶ بجو) څخه تر راتلونکو ۴۸ ساعتونو پورې له افغانستان سره اوربند اعلان کړي.
پاکستاني رسنیو د خپل هیواد د بهرنيو چارو وزارت د اعلامیې له مخې راپور ورکړ چې دا پرېکړه د افغان طالبانو د حکومت د رسمي غوښتنې په اساس شوې ده.
خو د طالبانو د حکومت ویندوی ذبیح الله مجاهد وايي چې د اوربند غوښتنه د پاکستان حکومت کړې ده.
د پاکستان د باندنیو چارو وزارت په اعلامیه کې ویل شوي:
«د افغان طالبانو د غوښتنې په اساس به له نن ماښام څخه د ۴۸ ساعتونو لپاره موقتي اوربند پلی شي.»
وزارت زیاته کړې چې د دې اوربند هدف د خبرو له لارې د کړکېچ د حل لپاره یو مثبت او رغنده بهیر ته لاره هوارول دي.
سرچینې وایي چې د افغانستان لپاره، د پاکستان ځانګړی استازی محمد صادق، به د دې خبرو مشري کوي، او ښايي د افغانستان د بهرنیو چارو وزیر هم د طالبانو له اړخه په دې خبرو کې برخه واخلي.