تاند ( شنبه د تلې – میزان ۱۹مه)په خوست ولایت کې د طالبانو د حکومت د ولایت ویاند مستغفر ګربز ویلي، تېر کال له پکتیکا، پکتیا او خوست ولایتونو شاوخوا ۵ زره ټنه د جلغوزیو حاصل ترلاسه شوي و، خو سږ کال یې حاصلات نږدې ۲۰ زره ټنو ته رسيږي.
نوموړی وایي دغه اندازه تېرکال ته ۳ برابره زیاتوالی ښيي.
هغه ويلي چې سږني جلغوزې د کیفیت له اړخه هم د تېر کال په پرتله غوره دي.
ګربز همداشان زیاته کړې چې، دامهال د خوست جلغوزې یوازې چین او پاکستان ته صادریږي، خو هڅې روانې دي، څو د خوست د جلغوزیو د صادراتو لړۍ نورو نړیوالو بازارونو ته هم وغځېږي.
د یادونې ده چې د پکتيا او پکتيکا ولايتونو جلغوزې هم له ونو تر شکولو وروسته، له غوټو د سپړلو او بسته بندۍ لپاره خوست ته وړل کيږي.
بل لورته بیا ځایي خلک هم سږکال خوښ ځکه دي چې ورته کاري زمینه برابره شوې ده.