تاند (جمعه د تلې ـ میزان ۱۸مه) د تېر جمهوري نظام والي، ضیاءالحق امیرخېل پر کابل د پاکستان هوايي بریدونه ښکاره تجاوز او تېری بللی او ویلي یې دي چې، اسراییل او پاکستان دغه ډول کړنې ترسره کوي.
امرخېل وايي، پاکستان له لسیزو راهیسې په افغانستان کې د نظامونو د ړنګېدو او کمزوري کولو لپاره کار کوي او د افغانانو یو موټی کېدل نهايي اړین دي.
نوموړي پر نړیوالې ټولنې غږ کړی، چې د پاکستان د یرغل پر وړاندې واضح غبرګون وښيي او چوپ پاتې نه شي.
تېره شپه د پاکستان پوځ الوتکو کابل کې هوایي بریدونه کړي.
راپورونه وايي، دغه برید کې د پاکستاني طالبانو د تحریک مشر، نورولي مسید او د هغه ملګري په نښه شوي، خو مسید ته یوه منسوب غږ کې اورېدل کېږي، چې نه دی وژل شوی.
د معلوماتو له مخې دا لومړی ځل دی، چې د افغانستان په معاصر تاریخ کې پاکستان پر افغان پلازمېنې یرغل کوي.
ضیاءالحق امرخېل ویلي، پر دې یرغل دردېدلی او له پاکستان د غچ هیله لري.