تاند (پنجشنبه د تلې ـ میزان ۱۷مه) د افغان سولې په برخه کې د امریکا پخواني ځانګړي استازي زلمي خلیلزاد د حماس او اسراییل ترمنځ د اوربند د لومړي پړاو پر سر له هوکړې هرکلی کړی.
زلمي خلیلزاد ویلي، دا هوکړه د امریکا د ولسمشر ډونالډ ټرمپ د طرحې پر بنسټ شوې، چې د یرغمل شویو کسانو د خوشې کېدو او د اسراییلي پوځیانو د شا تګ برخه هم په کې شامله ده.
نوموړي د اسراییل او حماس ترمنځ د اوربند د لومړي پړاو هوکړه له هیلو ډک پړاو یاد کړی او هیله یې ښودلې چې دا ګام به د وینې بهونې او تاوتریخوالي د کمېدو په برخه کې د اوږدمهالې سولې پر لور حرکت وکړي.
حماس او اسراییل پرون «چهارشنبه» د امریکا د ولسمشر ډونالډ ټرمپ د ۲۰ماده یېزې سولې د طرحې د لومړي پړاو په اړه هوکړه وکړه.
د رویټرز د راپور له مخې، دا هوکړه د اسراییل او حماس ترمنځ د نا مخامخ خبرو له لارې په مصر کې شوې، چې پکې اوربند، د یرغمل شویو تبادله شامله ده او ښايي دواړه د روانې شخړې د پای لپاره لار هواره کړي.