تاند (جمعه، د تلې/ میزان ۱۱ مه) له کونړ ولایت څخه رارسیدلي راپورونه وايي چې نن (جمعه) د غرمې شاوخوا ۱۲ بجې د کونړ ولایت په دانګام ولسوالۍ کې د طالبانو او پاکستاني ځواکونو ترمنځ یو ځل بیا نښتې شوي دي.
تر اوسه د دې نښتو د احتمالي مرګ ژوبلو په اړه جزییات نه دي ترلاسه شوي خو سرچینې وايي چې د ډیورندکرښې له دواړو خواوو پر یو بل د درنو او سپکو وسلو ډزې شوي.
راپورونه زیاتوي چې د پنجشنبې له سهار راهیسې دواړو لورو څو ځله د کونړ په ناړۍ ولسوالۍ کې هم سره نښتې کړي دي.
ملګرو ملتونو ویلي چې یوازې د روان کال په ترڅ کې د پاکستاني ځواکونو او طالبانو ترمنځ ۱۴ نښتې ثبت شوي دي.
د طالبانو او پاکستاني ځواکونو ترمنځ مهمې نښتې
- کونړ او ننګرهار (۲۰۲۲ – ۲۰۲۳)
- په کونړ او ننګرهار ولایتونو کې څو ځلې نښتې شوي دي. پاکستاني ځواکونو هڅه کړې چې د ډیورند کرښې په اوږدو کې د اغزن تار غځولو کار ته دوام ورکړي، خو طالبانو ورته اجازه نه ده ورکړې.
- د دې پر سر څو ځله وسلهوالې نښتې شوي او دواړو لورو ته تلفات اوښتي دي.
- سپین بولدک – چمن (ډسمبر ۲۰۲۲)
- په کندهار کې د سپین بولدک – چمن پوله څو ځله وتړل شوه.
- د ډسمبر په یوه نښته کې لږ تر لږه ۶ پاکستاني پوځیان او ۵ ملکي افغانان ووژل شول.
- طالبانو وویل چې پاکستاني پوځیانو د افغانستان خاوره ویشتې وه، خو اسلاماباد پر طالبانو د ډزو د پیلولو تور پورې کړ.
- ننګرهار – تورخم (مارچ ۲۰۲۳)
- د تورخم دروازه څو ځله د دواړو خواوو ترمنځ د نښتو له امله وتړل شوه.
- د مارچ په نښتو کې دواړو لورو درنې وسلې کارولې، ملکي خلکو ته هم زیان ورسېد.
- کونړ (۲۰۲۴ – ۲۰۲۵)
- د ملګرو ملتونو د راپور له مخې یوازې په روان ۲۰۲۵ کال کې لږ تر لږه د طالبانو او پاکستاني پوځ ترمنځ ۱۴ نښتې ثبت شوي دي، ډېری یې د کونړ په ناړي او دانګام ولسوالیو کې شوي دي.