تاند (جمعه، د تلېږ میزان 11 مه) ایران په دې غور کوي چې سلګونه زره افغان کډوال د خپلو لوېدیځو پولې له لارې عراق او ترکیې ته پرېږدي.
د ګارډین د راپور له مخې، دا به د هغې نوې تګلارې برخه وي چې غواړي پر اروپايي هیوادونو فشار راوړي چې د اتومي پروګرام په خاطر پر ایران بندیزونه ونه لګوي.
همداراز دغه څو اړخیزه تګلاره د ایران د توغندويي پروګرام پراختیا، د هوايي دفاعي سیستمونو پیاوړتیا، د ملګرو ملتونو د وسلو د تفتیش له ادارې سره د همکارۍ ځنډول، او د اکتوبر په ۱۸مه د ملګرو ملتونو د هغې کمېټې د جوړېدو مخنیوی پکې شامل دي چې د بیا پلي شویو بندیزونو د څار مسوولیت پر غاړه لري.
د لوېدیځ لور ته د افغان کډوالو د لېږلو ګواښ، د ترکیې د ولسمشر رجب طیب اردوغان هغې خبرې ته ورته والی لري چې اروپا ته یې د ملیونونو سوري کډوالو د لېږلو ګواښ کړی و.
ایران کله ناکله اړ شوی چې تر ۶ میلیونه پورې افغان کډوال ومني، خو د بخښنې د نړیوال سازمان یا امنستي انټرنیشنل د راپور له مخې، یوازې په ۲۰۲۵ کال کې یو میلیون افغان کډوال بېرته افغانستان ته ستانه شوي دي، هغه کسان چې یا د فقر له امله او یا د اسلامي امارت د واکمنۍ له امله ایران ته تللي وو.
امنستي ویلي چې د ایران له لوري د دغو افغانانو په زوره ایستل پر دغه هیواد د جون په ۱۲مه د اسراییل له بریدونو وروسته چټک شوي دي. د دې ادارې په اټکل، له همدې نېټې راهیسې شاوخوا ۵۰۰ زره افغانان بېرته د پولې هاخوا شړل شوي دي.
د ۲۰۲۵ تر مارچ پورې، میلیونونه افغانانو ته اجازه ورکړل شوې وه چې په ایران کې د لنډمهاله قانوني اوسېدو لپاره د «سرشمېرنې» سند ترلاسه کړي. د دغه سند لرونکو ته اجازه وه چې له محدودو خدماتو لکه دولتي روغتیايي خدماتو، عامه زدهکړې، د کار اجازې، بانکي حساب او د کرایې قراردادونو ګټه واخلي. خو چارواکو وروسته دغه اسناد لغوه کړل.
ایراني چارواکو د افغان کډوالو د شمېر په اړه بېلابېلې شمېرې ورکړي دي، خو داسې اټکل کېږي چې لږ تر لږه ۲ میلیونه افغانان په ناقانونه ډول په ایران کې اوسي. د کډوالو لپاره د ملګرو ملتونو لوی کمېشنر اټکل کړی چې ښايي سږ کال تر ۴ میلیونو پورې افغانان بېرته افغانستان ته واستول شي.