تاند (سې شنبه، د تلې/ میزان لومړۍ) د بلجیم پولیس یو افغان، چې ۴۷ کلن دی، د خپلې پخوانۍ مېرمنې او دوو نورو کسانو د وژلو په تور نیولی دی. دغه سړی د یکشنبې په ورځ، څو ورځې وروسته له هغه ونیول شو چې د کورني تاوتریخوالي په جرم محکوم شوی و.
قربانیان یوه ۴۳ کلنه ښځه او دوه سړي (۴۵ او ۶۷ کلن) دي چې د چړې په ګوزارونو وژل شوي دي.
د بلجیم د چارواکو په وینا، پولیس د کورني تاوتریخوالي د یوې پېښې په اړه له خبرېدو وروسته، غرمه مهال سیمې ته ورسېدل.
نیول شوی کس تورن دی چې لومړی یې یو ۴۵ کلن سړی ـ چې د کورنۍ له پېژندویو کسانو څخه معرفي شوی ـ وژلی او وروسته یې خپله پخوانۍ مېرمن په بل ځای کې وژلې ده. د همدې ورځې په ماښام یو ۶۷ کلن سړی هم د هغه له خوا وژل شوی دی.
پولیس دا سړی له څو ساعته تعقیب او پلټنو وروسته د ښار د رېلګاډي تمځای ته نژدې، چې د پېښې سیمې ته څېرمه و، ونیوه.
څارنوالۍ تایید کړې چې مشکوک یوه اوونۍ مخکې د کورني تاوتریخوالي په تور په یو کال بند محکوم شوی و، خو د حکم تر صادرېدو وروسته خوشې شوی و.
چارواکي وایي، د دې وژنو د انګېزې د روښانه کېدو لپاره څېړنې روانې دي.