تاند (شنبه د وږي ـ سنبلې ۲۹مه) د بښنې نړیوال سازمان وايي، طالبانو پر افغان مېرمنو او نجونو ژوند تریخ کړی او پر هغوی بندیزونه د زغم وړ نه دي.
یاد سازمان زیاته کړې، چې طالبانو افغان ښځې نږدې له ټولو برخو ایستلي او د هغوی حقونه او وقار یې ترې اخیستی دی.
د بښنې نړیوال سازمان دا اندېښنه وروسته له هغې ښودلې، چې طالبانو په پوهنتونونو کې د ښځينه لیکوالو د کتابونو پر تدریس بندیز ولګاوه.
دغه سازمان دا وروستی بندیز هم د ښځو د غږ د چوپ کولو یوه بله هڅه بللې ده.
د بښنې نړیوال سازمان له طالبانو جدي غوښتي، چې د ښځو او نجونو حقونه له کوم توپیر پرته ومني.
نړیوال سازمانونه وايي، طالبانو له تېرو څلورو کلونو راهیسې د افغان مېرمنو پر وړاندې سیستماتیک کار پیل کړی، څو له هرې برخې وایستل شي.
تېره اوونۍ د ملګرو ملتونو سرمنشي، پر ښځو د طالبانو بندیزونه احمقانه وبلل، خو طالبانو یې غبرګون کې وویل چې دا د شریعت له مخې لګېدلي دي.