تاند (سه شنبه د وږي ـ سنبلې ۲۵مه) د طالبانو د پوهنې وزارت خبر ورکړی، چې لوګر ولایت کې یې د ۴۹بابه ښوونځیو د بیارغونې چارې پیل کړې.
یاد وزارت په خبرپاڼه کې ویلي، چې د دې ښوونځیو بشپړېدو سره به ۳۰زره زدهکوونکو ته ارام او مناسب ښوونیز چاپېریال برابر شي.
د یاد وزارت خبرپاڼه کې راغلي، دغه ښوونځي په محمد اغې، خوشي، بره کي برک، خروار او د یاد ولایت مرکز کې بیارغول کیږي.
خبرپاڼه کاږي چې د دغې پروژې ټولیز لګښت ۳۶.۱۹ میلیونه افغانۍ اټکل شوی، چې د طالبانو د پوهنې وزارت د یوه همکار بنسټ له لوري ورکول کیږي.
د یادو ښوونځیو د بیارغونې چارې به تر راتلونکو څلور میاشتو بشپړې شي.
تر دې وړاندې د یادو سیمو اوسېدونکو د ښوونځیو له خراب وضعیت شکایت درلود.