تاند (پنجشنبه د وږي ـ سنبلې ۲۰مه) د طالبانو حکومت په یوه تازه پرېکړه کې په پنجشیر ولایت کې تصویري نشرات په بشپړ ډول بند کړل.
په پنجشیر کې د طالبانو د ولایت ویاند سیفالدین لتون، رسنیو ته ویلي چې، د دولتي او خصوصي رسنیو په تصویري نشراتو یې بندیز لګولی دی.
لټون زیاته کړې چې، دا پرېکړه نن د دې ولایت د سیمه ییزو مسوولانو له خوا نیول شوې ده.
افغانستان کې د طالبانو له بیا حاکمیت را وروسته رسنیز بهیر له سختو محدودیتونو سره مخ دي.
د نظر خاوندان وایي طالبانو په بشپړ ډول رسنۍ او د بیان ازادۍ سانسور کړې او لاهم هڅه کوي د حقایقو د خپراوي لپاره په ځینو ولایتونو کې محدودیتونه زیات کړي
په پنجشیر کې د رسنیو د انځوریزو نشراتو د لګېدو لامل لا نه دی معلوم شوی او نه هم طالبانو په دې تړاو واضح څه ویلي دي.