تاند (پنجنشبه، د زمري/ اسد ۳۰ مه) د افغانستان لپاره د امریکا سفارت، چې په دوحه کې فعالیت کوي، نن اعلان وکړ چې ډان براون د دې سفارت د نوي شارژدافېر په توګه معرفي شوی دی. نوموړی به په موقتي ډول دا دنده پر مخ وړي.
د سفارت له لوري په خپره شوې خبرپاڼه کې ویل شوي:
«موږ له شارژدافېرې کرن ډيکر سره خدایپاماني کوو او د هغې د کلونو خدمت او د متحده ایالاتو د افغانستان په ماموریت کې د هغې د ژمن مشرتابه له امله، ورڅخه مننه او قدرداني څرګندوو. له موږ سره یوځای شئ څو له ښاغلي ډان براون څخه د نوي شارژدافېر په توګه هرکلی وکړو.»
براون د ۲۰۲۳ کال د نوومبر له میاشتې راهیسې د افغانستان لپاره د امریکا په سفارت کې د ماموریت د مرستیال په توګه دنده ترسره کړې ده او اوس په موقتي ډول د شارژدافېر مسئولیت پر غاړه اخلي.
د امریکا سفارت خپل مرکزي دفتر د ۲۰۲۱ کال د اګست له میاشتې، د کابل له سقوط وروسته، دوحې ته چې د قطر پلازمېنه ده، انتقال کړ او له هغه وخته راهیسې د دې هېواد دیپلوماتیک ماموریت د افغانستان په اړه له همدې ځایه اداره کېږي.