تاند『دوشنبه د زمري ـ اسد ۲۷مه』 هرات کې د طالبانو د ولایت مقام ویلي، تر اوسه شاوخوا ۵ زره را ستانه شوي کډوال د صنعتي ښارګوټي په فابریکو او تولیدي شرکتونو کې په کار ګومارل شوي دي.
په دې اړه خپاره شوي خبرپاڼه کې لیکل شوي چې ، د استخدام لړۍ روانه ده او ټاکل شوې چې ۱۰ زره تنه نور هم په بېلابېلو فابريکو کې په کار وګومارل شي.
دا اقدام داسې مهال کېږي چې پاکستان او ایران د افغان کډوالو د ایستلو تازه لړۍ پیلوي.
د ایران کورنیو چارو وزیر ویلي، چې په لومړي قدم کې به دوه میلیونه غیر قانوني افغان کډوال له ایران څخه وویستل شي او د دوی د ایستو پر تګلارې کار روان دی.
اسکندر مومني وایي، اوسمهال ایران کې کابو ۶ میلیونه افغانان اوسېږي، او طبیعي ده چې د دوی مدیریت ملي او نړیوالې بېړنی لاسنیوی غواړي.
هغه ویلي، چې تر ډېره به افغان کډوال د خراسان دروازې له لارې وویستل شي.
بل لورته بیا پاکستان هم د کډوالو د جبري ایستو لپاره تابیاوې نیولي.
خو طالبان وایي، چې دوی په تورخم کې د کډوالو راتګ ته پوره چمتووالی نیولی او د خپلو هېوادوالو راتګ ته سترګې په لار دي.