تاند『پنجشنبه د زمري ـ اسد ۱۶مه』د پاکستان له زندانونو ۲۹۹ افغان زنداني کډوال ازاد او افغانستان ته راستانه کړای شول.
د طالبانو د کډوالو او بیرته راستنېدونکو چارو وزارات نن (پنج شنبه) پر خپله اېکس پاڼه لیکلي چې، دغه بندیان تېره یوه اوونۍ کې د کندهار د سپین بولدک له لاري هیواد ته راستانه کړای شوي دي.
یاد وزارت وایي، راغلو کډوالو ته د مرستو تر ورکولو وروسته خپلو سیمو ته لېږدول شوي دي.
سرچینه زیاتوي، دغه کسان د یاد هیواد په بېلابېلو سیمو کې پاکستاني پولیسو نیولي او له ۲۰ ورځو څخه تر درېیو میاشتو په زندانونو کې بندیان وو.
سرچینې تر دې وړاندې د یاد هیواد له زندانونو څخه د ۲۵۰ تنه افغان بندیانو د خوشې کېدلو خبر ورکړی دی.
دا کسان داسې مهال له زندانه خوشې او افغانستان ته راستنېږي، چې پاکستان تازه د کډوالو د ایستلو بله څپه پیلوي او غواړي له دغه هېواده د پي او آر کارت لرونکي وباسي.
ملګرو ملتونو د کډوالو عالي کمیشنرۍ هم پرون چهارشنبه د پاکستان پر دې پرېکړې خواشیني ښودلې وه او ویلي یې وو چې د پاکستان دا حرکت له کړو ژمنو سرغړونه ده.