تاند (دوشنبه، د زمري/ اسد ۱۳ مه) د عینک د مسو د کان له سیمې څخه ۱۴۳۰ تاریخي او لرغوني آثار د اطلاعاتو او کلتور وزارت د لرغونپېژندنې ریاست ته انتقال شول.
د دغه وزارت د لرغونپېژندنې رئیس، ذبیحالله سادات، ویلي چې د دغو آثار د انتقال هدف د هغوی پاکول او ترمیم دی.
د دغه چارواکي په وینا، د دغو لرغونو آثارو تاریخ نژدې پنځه زره کاله پخوانی دی.
یاد آثار خټین یا کلالي، ډبرین، فلزي، ښیښهيي او یا هم له هډوکو او لرګو جوړ دي. د کوشانیانو او ساسانیانو دورې سکې، ډبرلیکونه، کوزړي، جامونه، د مسو بنګړي، لاجورد او عاج یې نور مهم آثار بلل شوي دي.
وروسته له دې چې په ۲۰۲۱ کې طالبان بیا واک ته ورسیدل د افغانستان د تاریخي میراثونو او لرغونو اثارو د ساتنې په اړه ډېرو فرهنګي شخصیتونو او یونسکو ته جدي اندېښنه بیدا شوه ځکه چې طالبانو د خپل واک په لومړۍ دوره کې د بودا د مجسمو په شمول ګڼ شمېر لرغوني اثار ویجاړ کړل، خو دا ځل طالبانو نه یوازې لرغوني اثار ویجاړ کړي نه دي بلکې ساتلي یې دي او په ځلونو یې د لرغونو اثارو د قاچاق او لوټ مخه نیولې ده.