تاند 『پنجشنبه د زمري ـ اسد ۲مه』د طالبانو د کلیو د بیارغونې او پراختیا وزارت مسوولان وايي، چې په تېر یوه کال کې یې د هېواد په بېلابېلو ولایتونو کې د ۴۲۶ ميليونه افغانيو په لګښت ۱۴۳ چک ډېمونه جوړ کړي دي.
د یاد وزارت د دفتر رييس مولوي مرزا محمد شکيب زیاتوي، چې دا چک ډېمونه د سېلابونو د مهار، د اوبو د زېرمو او د سرچينو د مدیریت په موخه د ۱۳ ولایتونو په ۱۴۳ ولسوالیو کې جوړ شوي دي.
یاد وزارت دغه پرمختګ د کلیوالو سیمو د ثبات، پرمختګ او تولید د ملاتړ یوه مهمه لاسته راوړنه بولي.
سرچینې دغه راز د طالبانو تر واک لاندې ادارو د تېر يو کلنو لاسته راوړنو د تشرېح په پروګرام کې زیاته کړه، چې اوسمهال د بادغيس ولايت په «قادس خوردک» سيمه کې د يو لوی بند د رغولو چارې په چټکی سره روانې دي.
د معلوماتو له مخې په دغه بند څه باندې ۱۳ ميليونه امريکايي ډالر لګښت راځي او په بشپړېدو سره به يې د قادس خوردک ۱۴ سوه هکټاره کرنيزه ځمکه خړوبه شي.
دغه راز به د دغه بند په جوړېدو سره او د قلعه نو شبکې د ذخيرې سرچينې هم له همدې بنده تغذيه شي.
د دې چک ډېمونو د جوړېدو خبر داسې مهال ورکول کېږي، چې د افغانستان د مرکز کابل په ګډون په ولایتونو کې د وچکالۍ د زیاتېدو اندېښنې په ډېرېدو دي.
خلک او د دغې برخې پوهان د اوبو د مدیریت او د بې ځایه لګښت د مخنیوي غوښتنه کوي.