تاند (دوشنبه، د چنګاښ/ سرطان ۳۰ مه) پاکستاني رسنۍ د طالبانو د کورنیو چارو له سرپرست وزیر سراج الدین حقاني سره په کابل کې د خپل هیواد د کورنیو چارو وزیر محسن نقوي د یکشنبې د ورځې کتنه مهمه بللې ده.
د پاکستان د کورنیو چارو وزیر محسن نقوي د یکشنبې په ورځ له خپل افغان سیاري سراجالدین حقاني سره په دې کتنه کې له ترهګرۍ سره د مبارزې د پیاوړتیا، پر دیورند کرښه د غیرقانوني تګ راتګ د مخنیوي او د د ټي ټي پي یا د پاکستاني طالبانو له لوري د متوجې ګواښ په ګډون، پر یو شمېر مهمو موضوعاتو بحث وکړ.
کله چې نقوي د افغانستان د کورنیو چارو وزارت ته ورسېد، هلته یې د وزیر حقاني له لوري تود هرکلي وشو. دواړو وزیرانو د دوه اړخیزو اړیکو د پراخولو پر څرنګوالي مفصلې خبرې وکړې. د دواړو لوریو تر منځ د نشهيي توکو د قاچاق، پر دیورند کرښه د تګ راتګ د غیر قانوني حرکتونو، او په پاکستان کې د د بې اسناده افغان وګړو د بېرته ستنولو پر موضوعاتو هم بحث وشو.
د افغانستان د بهرنیو چارو وزیر: د افغان کډوالو ایستل مایوسوونکی عمل دی
د پاکستاني رسنیو پر اساس، د دواړو هېوادونو استازو د سوله ییز ګډ ژوند او متقابلې همکارۍ پر ارزښت ټینګار وکړ. دواړه خواوې په خپل منځ کې د امنیت د ښهوالي او د ترهګرۍ د ګواښونو د له منځه وړلو لپاره د همغږۍ د زیاتېدو پر اړتیا سره سلا شوې.
وزیر نقوي وویل: “ترهګرې ډلې په سیمه کې ګډوډي او بېثباتي را منځ ته کوي. پاکستان او افغانستان باید یو موټی شي څو دغه ګواښ ته ماتې ورکړي.”
نقوي له افغانستان سره د ورورولۍ او اوږدمهاله اړیکو ژمنه تکرار کړه او یادونه یې وکړه چې پاکستان له ډېرو کلونو راهیسې د افغان کډوالو کوربه پاتې شوی دی. هغه زیاته کړه: “زموږ دروازې د افغان وګړو لپاره د قانوني تګ راتګ په برخه کې پرانیستې دي.”
پاکستان او افغانستان د امنیتي همکارۍ پیاوړتیا ته ژمن شول
په دې ناسته کې د افغانستان د کورنیو چارو وزارت مرستیال ابراهیم صدر، د پاکستان لپاره د ځانګړي استازي محمد صادق، د کورنیو چارو فدرالي سکرتر خرم آغا، او د دواړو هېوادونو د کورنیو چارو وزارتونو جګپوړو چارواکو ګډون کړی و.
له دې وړاندې، وزیر نقوي کابل ته د خپل یو ورځني رسمي سفر په ترڅ کې د کابل نړیوال هوايي ډګر ته راورسېد، چې هلته د افغانستان د کورنیو چارو مرستیال وزیر محمد نبي عمري او نورو لوړپوړو افغان چارواکو یې هرکلی وکړ.
د نقوي سفر څو ورځې وروسته تر هغه ترسره کېږي، چې د پاکستان مرستیال صدراعظم او د بهرنیو چارو وزیر اسحاق ډار هم کابل ته سفر کړی و. ډار هم په کابل کې د طالبانو د کورنیو چارو له وزیر حقاني سره د سیمې د امنیت او د سرحدي مدیریت په اړه مفصلې خبرې کړې وې.
دواړو خواوو د سیمې د امنیتي ګواښونو د له منځه وړلو پر ارزښت او د سولې او ثبات د ټینګښت لپاره پر نژدې همکارۍ ټینګار کړی و.