تاند『سه شنبه د چنګاښ ـ سرطان ۱۰مه』د طالبانو د ریاست الوزراء اداري مرستیال مولوي عبدالسلام حنفي له هرات ولایت وروسته نیمروز ته تللی او هلته یې د راستنېدونکو له کمپونو لیدنه کړې.
نیمروز کې د طالبانو د ولایت مقام د خبر په بنسټ حنفي نیمروز کې د راستنېدونکو وضعیت او د خدماتي کمېټو د فعالیتونو ارزونې په موخه ورېښمو پله ته څېرمه د کډوالو له کمپونو لیدنه کړې.
خبرپاڼه کې راغلي، دغه لوړ پوړي پلاوي د را ستانه شویو ستونزې واورېدې او د حل په موخ یې ډاډ ورکړ.
نوموړي نیمروز ته د سفر په ترڅ کې د راستنېدونکو کډوالو لپاره د ۱۶ میلیونه افغانیو په لګښت د یوه کمپ جوړولو پرانېسته هم وکړه.
دا په داسې حال کې ده، چې په دې وروستیو کې له ایران څخه د افغان کډوالو د راستنېدو لړۍ چټکه شوې ده.
یوازې په تېره جون میاشت کې ۲۵۶ زره افغان کډوال له ایرانه ایستل شوي دي.