تاند『یکشنبه د چنګاښ ـ سرطان ۸مه』د افغانستان – پاکستان د سوداګرۍ ګډې خونې ویلي، چې په کراچۍ بندر کې د افغان سوداګرو تر ۱۲۰۰ زیات کانټینرونه بند پاتې دي.
د دې خونې رئیس خان جان الکوزی زیاتوي، چې دا کانټینرونه د توکو د څېړنې د سست بهیر او ګڼېګوڼې له امله بند پاتې دي.
الکوزی زیاتوي،چې په دغو کانټینرونو کې تر ډېره خوراکي توکي بار دي.
نوموړی د پاکستان له حکومته غواړي چې د دغو کانټینرونو د ارزونې بهیر ګړندی کړي.
د افغانستان – پاکستان د سوداګرۍ ګډې خونې مسوولینو دغه راز ویلي، چې پاکستاني چارواکو تر دې وړاندې په یاد بندر کې د کانټینرونو د ګړندۍ ارزونې ژمنې کړې وې، خو وايي اوس دا بهیر خورا سست روان دی.
سرچینه زیاتوي چې ورځ نه بلې ته د موټرو ګڼهګوڼه زیاتېدونکې ده.
د نظر خاوندان وایي، پاکستان تل له افغانستان سره دروغي ژمنې کړي او هڅه یې کړې ده، چې د افغان سوداګرو پر وړاندې خنډونه جوړ کړي.
د نظر خاوندان زیاتوي، چې پاکستان په سیاسي موخو کې تل د افغانستان پر وړاندې سوداګریز اړخ د یو فشار په توګه کارولی، چې له امله یې هم ځان او هم افغان سوداګرو ته زیان اړوي.