تاند『پنجشنبه د چنګاښ ـ سرطان ۵مه』د وروستیو معلوماتو له مخې یوه بیلاروسي وګړي ۲ کلن افغان ماشوم په ځمکه ویشتلی، چې د کوپړۍ او ملا تیر د سختو ټپونو له امله په کوما حالت کې تر جدي مراقبت لاندې دی.
دا پېښه پرون چهارشنبه د مسکو په شیرمتیو نړیوال هوايي ډګر کې شوې.
یاد بیلاروسی وګړی د پولیسو له لوري نیول شوی او دا مهال ترې تحقیقات روان دي.
ژوبل افغان ماشوم یزدان نومېږي او که څه هم د دې زړه بوږنوونکې پېښې علت نه دی معلوم، خو خپاره شوي معلومات ښيي، چې بیلاروسي وګړي د نشې حالت کې دا کار ترسره کړی دی.
له دې پېښې سره سم په نړیواله کچه د افغان کډوالو په تړاو پراخې اندېښنې پیدا شوې دي.
تر اوسه په مسکو کې د طالبانو استازو د دغې پېښې په تړاو کوم غبرګون نه دی ښودلی او نه یې د پلټنو په تړاو کوم جزییات ورکړې دي.
په ټولنیزو رسنیو کې د دې پېښې خپره شوې وېډیو ته افغانانو سخت غبرګونونه ښودلي او بیلاروسي وګړي ته یې د ختې سزا غوښتنه کړې ده.