تاند『چهارشنبه د چنګاښ ـ سرطان ۴مه』د طالبانو د کرنې اوبو لګولو او مالدارۍ سرپرست وزیر عطاءالله عمري کابل کې د جاپان سفیر تاکایوشي کورمایا سره کتنه کې د موسساتو له لوري مرستو په وېش نیوکه کړې او ویلي یې دي، د دغو مرستو زیاته برخه د ادارو په لګښتونو مصرفیږي او ډېره کمه برخه خلکو ته رسیږي.
عمري ویلي، که د افغانستان خلکو سره د نړیوالو مرستې دې دوی سره په همغږۍ ترسره شي روڼتیا او اغېزمنتیا به یې زیاته وي.
نوموړي د جاپان له سفیره غوښتي، چې نړیوال بازار کې دې د افغان بزګرانو د محصولاتو خرڅلاو برخه کې زمینه برابره کړي.
بل لورته د جاپان سفیر ډاډ ورکړی، چې هېواد یې د افغانستان خلکو او بزګرانو دوامداره ملاتړ ته ژمن دی او نشه یي توکو سره مبازره یې له لومړیتوبونو ده.
دغه څرګندونې داسې مهال کیږي، چې تر دې وړاندې طالبانو د موسساتو له لوري د مرستو رسولو په پروسې نیوکه کړې او له مرستندویه هېوادونو یې غوښتي، چې مرستو کې د روڼتیا لپاره دې د افغانستان حکومت له لارې دغه مرستې ترسره کړي.