تاند「شنبه د غبرګولي ـ جوزا ۲۴مه」د تهران پېشوا ولسوالۍ د پولیسو قوماندان ویلي، چې د افغانې کډوالې، کبرا رضايي د قتل په تور یې یو تن نیولی او پر خپل جرم یې اعتراف هم کړی دی.
ایراني چارواکي وایي، تورن کس په لومړنیو څېړنو کې د کبرا رضایي په وژل کېدو کې لاس لرل منلي دي.
نیول شوی کس د نورو څېړنو لپاره په زندان کې ساتل کېږي.
ایران کې د کبرا رضايي په نامه یوه افغانه کډواله د روانې جون میاشتې په پیل کې نادرکه او څه موده وروسته یې مړی چې په بې رحمۍ وژل شوې وه، وموندل شو.
که څه هم پولیسو د هغې د قتل په تور د نیول شوي ایراني د هویت په اړه نور معلومات نه دي ورکړي، خو ویل شوي چې هغې له تورن کس سره د واده انکار له امله وژل شوې ده.
راپورونه وايي، ایران کې له دې وړاندې نه یوازې افغانان په مرموز ډول وژل شوي، بلکې دغلته د افغان کډوالو د جبري اخراج، نیولو او د تورونو له امله د اعدام لړۍ هم چټکه شوې ده.
له دې وړاندې د بشري حقونو یو شمېر سازمانونو په ایران کې د افغان کډوالو په ځانګړې توګه د دغه هېواد د حکومت له لوري د اعدام سزاوو د بندلو په اړه غبرګونونه ښودلي دي.